KUCHING: Opis Menteri Dagang Temuai, Industri Kreatif, enggau Seni Pemerindang (MTCP) nagit ngerejister abis kurang dua agi kluster ‘homestay’ tauka kluster nyemilik ba taun 2023.

Menteri iya, Dato Sri Abdul Karim Rahman Hamzah madahka, nya setipak enggau pengawa dikereja opis menteri taun tu ti lebih mekuh ngagai ngemansangka dagang temuai bepelasarka komuniti tauka raban bansa.

Ku iya, dalam Strategi Pemansang Pengudah COVID19 2030 (PCDS 2030) siti ari asil dalam sektor dagang temuai patut ditambahka dagang temuai bepelasarka komuniti sepenyampau 20 peratus ti ngemeratka pengawa ngangkatka penatai pemisi ruang bilik menua tu ke ngambi bagi dalam sektor tu.

“Naka November 2022, bisi dua agi kluster homestay iya nya Homestay Sungai Buloh, Sadong Jaya enggau Homestay Kampung Berambeh, Simunjan telah diddah direjister.

“Tu nyadika penyampau semua kluster homestay nambah ngagai 48 kluster, nambah 27 operator tauka pengemeran homestay.

“Ba taun 2023, abis kurang dua agi kluster homestay ditagit direjister,” ku iya lebuh ti nyimpul jurai MTCP ba Aum Ketiga Penggal Keterubah Aum Kunsil Negeri Sarawak Ke-19 ti diatur ba Kompleks DUN Sarawak ditu, kemari.

Bejaku baru iya madahka, kena seruran ngangkatka tikas pengemeran homestay sereta kapasiti enggau pengulih peranak menua tu, opis menteri ngatur mayuh bengkah latih enggau kus.

Entara latih enggau kus ke dipejalaika baka Latihan Hospitaliti Asas, Latihan Pakej Pemasaran dan Produk, Latih Pengurusan Acara sereta Bengkel Membuat Kraf, ku iya.

“Nengah kus ti baka tu, iya deka meransang lebih mayuh penyerata raban bansa dalam sektor dagang temuai enggau hospitaliti, ti enggau tuju nyungkakka penatai pemisi ruang bilik sida.

“Ba taun 2030, opis menteri aku deka numpu ngagai menilai(evaluate) penatai pemisi ruang bilik pengemeran homestay enggau mansik takah ke ditapi sida,” ku iya.

PEMANSANG DAGANG TEMUAI:AbdulKarimmandangka dua teks opis menteri ari baruh pegai iya ti nyengkaum MTCP, seraya disempulang sida ke bukai, ba aum DUN kemari.