Sepenyampau 154,475 iku nembiak serata Sarawak bulih penguntung ari 424 bengkah program nembiak, lumba enggau main, enggau orang dagang ke diatur dalam taun 2022.

Menteri Nembiak, Lumba enggau Main, enggau Pemansang Orang Dagang (MYSED), Dato Sri Abdul Karim Rahman Hamzah madahka, entara program ke diatur baka Sarawak E-Sports Games Expo, Hari Raban Nembiak Sarawak, Jelajah Belia Sarawak, MYSED Extreme Sports Challenge, MYSED Go Rural enggau mayuh agi program bukai.

Nitihku iya, program nya ditaur enggau kolaborasyen Opis Nembiak enggau Lumba enggau Main (JBS), Opis Pelajar, SABERKAS, PEMADAM, institusyen pelajar tinggi enggau gerempung ukai dikuasa perintah ke bukai ke ngatur program setipak enggau objektif MYSED.

“Opis menteri (MYSED) aku deka terus nempa kerejasama enggau raban ti bekaul kena menilai(evaluate), ngelanggur, bejalaika enggau matau aktiviti ti meri penguntung tauka pemanah, holistic enggau inklusif setipak enggau polisi, strategi, aspirasyen enggau nama ke dikearapka perintah.

“Kena nentuka semua program pemansang ke diperambu ulih dipejalaika sereta meri empas manah ngagai raban ditagit, opis menteri aku deka terus ngemerankan “#Tiada Minggu Tanpa Program” ti nyengkaum raban nembiak, lumba enggau main, enggau orang dagang deka dipejalaika serata Sarawak.

“MYSED udah ngelanggur 175 program ungkup taun 2023, ti nyengkaum 70 program pemansang raban nembiak, 70 program pemansang lumba enggau main, enggau 35 program orang dagang ti mekuh ngagai ekonomi, sosial enggau ngetanka rampa menua,” ku iya.

Abdul Karim bekunsi pekara nya lebuh ti nyimpul jurai MYSED ba Aum Ketiga Penggal Keterubah Aum Kunsil Negeri Sarawak Ke-19 ke diatur ba Kompleks DUN Sarawak ditu, kemari.

Bejaku baru iya madahka taun 2023 MYSED deka mekuh ngagai lebih mayuh program renggat nasional enggau antarabansa.

Iya madahka MYSED arap bendar program ke dilanggur sereta digokus nya deka nyapai juluk tauka objektif opis menteri dalam nambahka penyereta ari raban nembiak kelimpah ari nanam kualiti nyadi ketuai, semangat volunteer enggau kereja dalam siti tim, bisi pengarap ba diri empu enggau ulih betapi enggau pemar jemah ila.

MYSED udah ngenyakah enggau ngerembaika agi penyereta gerempung raban nembiak di Sarawak, ku iya, seraya madah aspirasyen tu ngemeratka MYSED nyadi ejensi pemudah cara penyereta gerempung raban nembiak.

“OpisMenteri(MYSED)aku deka terus ngungkupka geran, bekunsi, enggau ngemutangka penyereta gerempung nembiak enggau leumba enggau main ba taun bukai,” ku iya.