Sarawak Land Consolidation and Rehabilitation Authority (SALCRA) udah ngayanka tikas gawa ti manah dalam timpuh 10 bulan keterubah taun 2022 enti dibandingka enggau timpuh ti sama ba taun 2021.

Menteri Industri Barang Pemakai, Komoditi enggau Pemansang Kandang Menua Sarawak (M-FICORD), Dato Sri Dr. Stephen RUndi Utom madahka, tu diperansang ba penambah dalam mekanisma sereta bejalaika mayuh bengkah inisiatif kena betapi enggau suntuk orang gawa kasar (buruh).

“SALCRA mega ulih ngetanka setipikit Malaysian Sustainable Palm Oil (MSPO) ba semua ladang enggau kilang iya.

“Taja pia, enggau rega input betanam betupi ti balat niki enggau ungkus operasyen ketegal keruga dalam rentayan bekal ketegal pandemic COVID-19 enggau perang Ukraine-Rusia penguntung dikeruga (curbed profitability),” ku iya.

Dr. Rundi madahka pekara nya lebuh ti nyimpul jurai M-FICORD ba Aum Ketiga Penggal Ketrubah Aum Kunsil Negeri Sarawak Ke-19 ke diatur ba Kompleks DUN Sarawak ditu, kemari.

Berebak enggau tu, iya madahka SALCRA udah ngemansang enggau nanam sepenyampau 51,289 hektar tanah alai nanam kelapa sawit.

“Ari penyampau nya, 25,653 hektar tauka 50 peratus iya nya ladang ke udah tuai , 13,007 hektar (26 peratus) bedau tuai enggau 12,426 hektar tauka 24 peratus dalam proses ditanam baru,” ku iya.

Kelimpah ari pekara nya, iya madahka kena nentuka barang pemakai chukup, eksport pemakai beresi enggau orang bumai bekebun bepenatai pemisi tinggi lebuh manggai taun 2023, Sarawak begunaka sumber tanah kelimpah agi ngena agroteknologi.

“Dalam pekara tu, opis menteri (M-FICORD) deka terus meransang muka mayuh agi tanah asal kena nampi peminta guna ke ukai semina alai nanam komoditi tang mega ngeluarka pemakai nyengkaum nanam buah, padi, utai tupi enggau akuakultur,” ku iya.