Utusan Borneo

Dr Sim: 974 buah rumah panjai udah bulih penguntung ari Skim Loan Rumah Panjai

Bisi 974 buah rumah panjai ti nyengkaum 21,483 pintu bilik udah bulih penguntung ari Skim Loan Rumah Panjai, kenyau skim nya ditumbuhka.

Sapit Premier Sarawak ti mega Menteri Pengerai Mensia Mayuh, Pengawa Berumah, enggau Kaunsil Kandang Menua Sarawak, Dato Sri Dr Sim Kui Hian madahka, Skim Loan Rumah Panjai di Sarawak udah diberi kelala tauka ditumbuhka ba taun 1978.

“Aku deka madah ngagau Kunsil Negeri (DUN) iya nya sepenyampau 974 rumah panjai ti mungkur 21,483 pintu bilik udah bulih penguntung ari skim tu.

“Tu begunaka belanja sepenyampau RM335.19 juta ti dipelanja perintah besai enggau perintah Sarawak,” ku iya.

Dr. Sim madahka pekara nya lebuh ti nyimpul jurai Opis Menteri Pengerai Mensia Mayuh, Pengawa Berumah enggau Kaunsil Kandang Menua ba Aum Ketiga Penggal Keterubah Aum

Kunsil Negeri Sarawak ke-19 ke diatur ba Kompleks DUN Sarawak ditu, kemari.

Bejaku baru iya madahka, kenyau ari taun 2020, Housing Development Corporation (HDC) nenrima ungkup belanja RM50 juta ke dikemendarka tiap taun ari perintah Sarawak enggai RM10 juta ari perintah besai entara taun 2020-2022 ungkup skim nya (Skim Loan

Rumah Panjai).

“Naka baulan November 2022, sepenyampau RM142 juta udah diagih ti nguntungka 218 buah rumah panjai ti mungkur 4,747 pintu bilik.

“Ke diatu bisi 297 buah rumah panjai ti mungkur 5,865 pintu bilik benung nganti gintir nerima skim tu,” ku iya.

Berebak enggau tu iya madahka berengkah ari taun 2018 nyentuk diatu Longhouse Selection Committee udah ngemendarka loan sepenyampau RM2.34 juta ungkup lima (5) buah rumah panjai ti mungkur 82 pintu bilik dalam sitak DUN Krian enggau RM3.39 juta ungkup enam buah rumah panjai ti mungkur 113 pintu bilik ba DUN Engkilili.

“Naka ke diatu, bisi 11 buah ruamh panjai ti nyengkaum 167 pintu bilik di DUN Krian enggau 10 buah rumah panjai ti mungkur 149 pintu bilik ba DUN Engkilili ke agi nganti gintir diri nerima skim tu.

“Lalu ke penerang ADUN Bukit Semuja, naka ke diatu nadai langgur nambahka penyampau skim loan rumah panjai ari RM30,000 ngagai RM50,000 ke sepintu bilik.

“RM30,000 ke sepintu bilik baka ke disebut YAB Premier dalam Bajet 21 November 2022 agi sama. Tu ngambika lebih mayuh agi rumah panjai ti ngasaika penguntung ari program tu,” ku iya.

Berita Iban

ms-my

2022-12-01T08:00:00.0000000Z

2022-12-01T08:00:00.0000000Z

https://epaper.utusanborneo.com.my/article/282166475201979

Borneo Post