SIBU: Opis Menteri Pelajar Malaysia (KPM) udah ngemendarka agih belanja RM2.34 juta ungkup 23 buah sekula kena nentuka standard pelajar di Sarawak diangkat sereta dipejalaika enggau lanchar.

Sapit Menteri Pendidikan Lim Hui Ying madah, agih belanja nya deiberi ngagai sekula nya sekumbang penemuai iya 10 hari ke Sarawak, ti tembu ba Sekula Sekondari (SMK) Saint Elizabeth, kemari.

“Lebuh ke nemuai, aku udah ngelawa 17 buah sekula di Sarawak sereta udah meri agih belanja ngagai 23 buah sekula. Sepenyampau RM2.34 juta, siti penyampau ke mayuh udah diberi ngagai sekula di Sarawak,” ku iya madah maya aum media lebuh ke ngelawa SMK St Elizabeth.

Ku Lim, agih belanja ti diterima ari KPM nya nyengkaum agih belanja dikena ngemanahka agi agu tauka agih belanja ungkup sekela ti megai status Sekula Bantu Perintah (SBK).

“Sehari tu (kemari) di Sibu, penyampau ti diberi disengkaum enggau agih belanja SBK enggau agih belanja tambah aku ke nemuai, KPM udah diberi ngagai SMK St. Elizabeth sepenyampau RM110,000, SJKC Tiong Hing RM100,000 enggau SJKC Thai Kwang

RM100,000. Nya alai, penyampau agih belanja di Sibu iya nya RM310,000,” ku iya.

Ngenang pasal penemuai nya, Lim madahka batang tuju penemuai iya ke semua kandang menua di Sarawak endang deka ngabas sereta meda gaya sekula, ke alai iya udah nemuai ke Miri, Bintulu, Kuching, Bau, Sarikei enggau Sibu.

Ditanya bekaul enggau fokus KPM ungkup Sarawak ba taun baru, batang fokus utopis menteri endang deka ngenyampatka proses ngemanahka sekula repuk di

Sarawak, kelebih agi ti ngempu status ‘skala tujuh’.

“Baka taun tu, Menteri Besai mega udah suah nyenbut sentang beguan sekula repuk di Sarawak. Kami endang dalam proses ngemanahka sekula repuk di Sarawak tu.

“Mayuh sekula repuk di Sarawak ngempu status ‘skala tujuh’ lalu sekula ti skala tujuh tu patut direrak sereta digaga baru. Tu siti ari juluk ati menteri enggau KPM, iya nya ngelengkaska proses tu,” ku iya.

Kelimpah ari nya ku iya, KPM mega bisi meri fokus ngagai nembiak ti cherayan ari pelajar kelebih agi ba kandang pala menua, lalu KPM deka mansik bakani deka mutarka penanggul nya.

Lim mega besukur laban KPM entara opis menteri ti bulih agih belanja ke besai dalam bajet taun baru, baka ti dipadahka Menteri Besai.

“Kami amat besukur laban agih belanja ti diterima kami antara ke pemadu besai. Tu beguna amat laban agih belanja nya tau kena kereja ngemanah, laban mayuh sekula kitai udah tuai lalu utai di sekula patut dikemanahka.

“Nya alai kami dekaka bala anak nya belajar be endur ti likun sereta lantang. Bala anak tu mih ti nyadi ketuai menua jemah ila, nya kebuah kitai mesti nentuka pelajar ti diterima sida ti pemadu manah,” ku iya madah nyemetak.

Sama bisi enggau nemuai nya, Sapit Speaker Dewan Rakyat ke mega Kaban Parlimen Lanang Alice Lau, Kaban Parlimen Sibu Oscar Ling, Senator Roderick Wong, Ex-Kaban Kunsil Negeri Bukit Assek Irene Chang, Sapit Direktor Sektor Pelajar Opis Pelajar Negeri Sarawak Dr Les Met, Sapit Pemesai Opis Pelajar Pelilih Sibu Siti Mariam Abdul Rahman enggau Prinsipal SMK St Elizabeth Chee Hue Yiang.