KUCHING: Orang indu peransang mayuh agi ngena teknologi dikena ngangkatka raban tu dalam bidang Sains, Teknologi, Injinir enggau Matematik (STEM).

Penengkebang Timeless, Emma Yang, 19, madah naka ke diatu status ‘quo’ penyampau raban indu dalam bidang STEM tauka teknologi agi mimit tauka apin ngemuaska ati.

Iya bepenemu, enti deka nempa tauka ngaga produk ti ngemayuhka empas teknologi enggau mantu mensia mayuh, agi mayuh kereja ti patut dipejalaika kena ngangkatka mayuh penemu dalam bilik kelas, endur gawa enggau ke bukai.

“Aku berasai betuah laban dibesaika apai indai aku ti enda kala meri pengasai ngagai aku iya nya penempa aku patut nagang tauka ngemuntanka enda ngira bidang ti dikerindu aku.

“Sida (Apai indai) meransang aku nyadi orang ti deka nemu, deka nemu enggau enda kala ngetu belajar. Fakta kitai gempuru sehari tu iya nya kena nambah ni penyauh kitai nyingkang enggau pemansang ti udah dijapai kitai.

“(Nya alai) Kena ngangkatka indu dalam STEM, meransang mayuh agi penyereta indu dalam teknologi. Tang singkang kitai agi jauh. Status quo endur kitai bediri sehari tu endang enda chukup,” ku iya.

Iya madahka pekara nya maya ‘opening keynote: Changing the World with Code’ nengah chara online maya Forum Asia She-Tech 2023 ti diatur perintah Sarawak enggau SDEC ti diatur nyadi pra-acara Kongres Inovesyen enggau Teknologi Dunya (WCIT) ke-27 enggau Aum Besai Ekonomi Digital Antarabansa Sarawak (IDECS) ke-6 ba BCCK ditu, kemari.

Forum ti keterubah iya diatur nya fokus ngagai pekara bekaul enggau orang indu dalam industri teknologi.

“Nama ti deka dibai aku peratika kitai sehari tu pasal nadai penyemela ba penempa. Aku pechaya ukai anggap ti amat bekaul enggau pekara ti dikemeratka orang indu enggau lelaki dalam raban bansa kitai.

“Uji berunding, chukup ensiban ati sekalika nuan nya orang indu tauka lelaki laban deka nemu tauka bisi pengerindu ba sesebengkah bidang ke ditemu, tang semina nemu pemar enggau penanggul ti patut ditapi kena neruska bidang nya tauka ketegal faktor ti enda ulih diubah? Nya pekara ti amat nyadi ba tebal agi orang indu kemaya hari tu,” ku iya.

Iya madah, baka STEM tauka teknologi ti nyadi industri ti besai,endang begunaka mayuh pekara ti patut dikereja.

“Nya alai nyadi siku orang dagang indu ti bulih basa enggau pengaya dalam pejalai ti chukup ngemegahka, pesan aku ngagai kita semua iya nya pikirka ‘blind spot’ sereta seruran meresa nama ti patut mayuh dikereja enggau kena teknologi nyadi kereban mutarka penaggul dalam komuniti nya.

“Patut berunding bakani kitai ulih ngulihka pengulih kuasa teknologi ti amat meri empas manah ngagai semua orang enda ngira renggat umur enggau sekalika lelaki tauka orang indu.

“Laban ari nya kitai ulih mai ubah nuju ngagai pekara ti lebih manah,” ku iya.

Emma Yang siku prodigy ti genius dalam bidang ‘coding’ lalu dalam timpuh ti sama penengkebang sebengkah aplikesyen ti dikelala enggau nama Timeless.

Iya pemenang ‘AwardWinning Innovator’ sereta siku ari nembiak dalam bidang STEM (Sains, Teknologi, Injiniring enggau Matematik).

Emma ari ruang bilik ti betapi enggau penyakit Alzheimer, ini iya betapi enggau penyakit nya, berindik ari pengeran enggau pengekih deka mantu ini iya, Emma ngena pengelandik coding ti dikembuan iya ngaga aplikesyen Timeliess nya.

Asil ari aplikesyen ke digaga iya nya, ulih mantu bala pesakit Alzheimer bukai ngasaika pengidup ti lebih meruan taja pan betapi enggau penyakit nya.

Emma ngepunka pengawa iya deka ngasilka nya kenyau ari bulan 12 taun.