KUCHING: Perintah Sarawak deka negika polisi ti nempa tauka meransang enviromen inklusiviti, bela enggau peluang ngagai raban orang indu dalam teknologi.

Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madah, ukai semina bekaul enggau polisi tang penegap runding raban indu ti enda mudah ngalahka dieri nyapai ‘bintang’ mega patut ulih dikenatika kelimpah ari pengelandik enggau penemu.

“Nyadi siku menteri, aku besemaya deka negika politi ti meransang enviromen inklusiviti, bela enggau peluang raban indu dalam teknologi.

“Seraya kitai nyingkang dalam ‘corridors of binary codes’ enggau meraka landskap Artificial Intelligence (AI), aram kitai ingatka kuasa ba mayuh bengkah dalam nyungkak inovesyen.

“Awakka tetiap iku orang indu ti ngembuan juluk deka mai pemansang, saintis data tauka orang dagang teknologi nemu bisi endur iya dalam industri tu lalu nya mega nyadi elemen ke beguna dalam inovesyen,” ku iya.

Fatimah madahka pekara nya lebuh ke bejaku nutup Forum Asia She-Tech 2023 ti diatur Perintah Sarawak enggau SDEC nyadi praacara Kongres Inovesyen enggau Teknologi Dunya (WCIT) ke-17 enggau Aum Besai Ekonomi Digital Antarabansa Sarawak (IDECS) ke-6 ba BCCK ditu, kemari.

Forum ti keterubah iya diatur nya, fokus ngagai pekara ti bekaul enggau orang indu dalam industri teknologi.

“Kami udah ngepunka pejalai ti ngelui ari ‘coding languages’ enggau platform teknologi ti lalu nunjukka nengeri tu ukai semina dalam industri teknologi tang mega dalam dunya iya nya potensial tetiap iku orang indu diaku, dikerami enggau diperansang,” ku iya.

Dulu ari nya, iya ngenang sekeda pemar ti ditapi raban orang indu dalam industri teknologi ti meri empas ngagai pemansang profesional, kereja enggau pengelantang semua.

Entara pemar ti ditapi orang indu, ku iya, suah napi sterotaip ti enda arapka penau enggau pengelandik raban tu dalam bidang teknikal.

Nambah nya iya madah raban indu kurang pengari dalam sektor teknologi.

“Pemar ti ditapi indu dalam indutri teknologi selalu iya bulih penatai pemisi ti kurang ari raban lelaki, ngayanka bida gaji ti lebih besai,” ku iya.

Bejaku baru, iya madahka kena napi pemar nya, mayuh chara mutar enggau inisiatif beguna ulih dipejalaika nyengkaum bejalaika polisi ti meransang penyemela ba penempa baka gaji sebela, kemisi apai indai enggau polisi anti diskriminasi.

Nambah nya, ngatur program kena nempa mayuh bengkah, ekuiti enggau penyereta dalam kompeni teknologi enggau kompeni pemungkal.

“Nambahka akses ngagai pelajar enggau latih bekualiti dalam Sains, teknologi, Injinir enggau Matematik (STEM) ngagai raban nembiak indu enggau orang indu,” ku iya nyebut entera inisiiatif ke ulih dipejalaika dikena ngangkatka raban indu dalam industri teknologi.