SIBU: Di Sarawak, diberitaka bisi 675,077 iku pengundi baru naka 31 Disember taun siti nyin tadi lalu 66 peratus ari sida nya berumur entara 18 nyentuk 29 taun.

Penyampau pengundi ti mayuh tu tauka raban Undi18 baka ke diberitaka nya, udah ngujungka partiparti politik berebut ka sukung ari sida kelebih agi diatu, Pengawa Bepilih Besai Ke-15 (PRU15) nyau majak semak.

Taja pia, ni naka pengasi raban nya meri empas ngagai pemutus undi? Ulihka sida nirika siku raja?

Ba Menteri Pelajar, Inovasi enggau Pemansang Pengelandik I Sarawak, Datuk Dr Annuar Rapaee, iya enda setuju enggau peragam ti madahka bala nembiak nya enda ulih ngaga pemutus ti manah maya ngundi.

Ku iya, bala nembiak bisi kriteria sida empu beratika sapa ti tau nyadi ketuai sida.

“Raban nembiak tu mega amat fokus ngagai penau enggau tikas pelajar sesiku ti deka nyadi chalun.

“Bisi sekeda orang kelalu skeptikal pasal nembiak ti bisi hak ngundi ti beumur entara 18 enggau 28 taun. Taja pia, asai aku nya ukai isu agi,” ku iya lebuh dirandau pengarang berita bedau lama udah.

Penyandang Parlimen Sibu, Oscar Ling ngasaika raban pengundi baru tu tau nyadi pengulu maya pengawa bepilih parlimen tu ila, laban sida iya bisi urung 40 peratus ari penyampau pengundi di menua tu.

“Pengundi Undi18 tauka

pengundi biak endang nyadi pengulu maya PRU15, urung 6 juta ari nya (dalam menua), 40 peratus ari penyampau pengundi na PRU tu ila.

“(Lalu di) Sibu (sitak Parlimen) aku bisi 30,000 pengundi baru nyengkaum Undi18,” ku iya.

Taja pia, Ling ngaku chara ngundiba raban pengundi baru tu bedau ulih dipeda.

“Taja pia Undi18 nya faktor ti nadai kala bisi maya pengawa bepilih negeri ke dulu ari tu, tang engka tau ngubah semua nya. Trend chara sida ngundimengkang enda temu,” ku iya.

Taja pia, aktivis nembiak, Abdul Taib Rosli, pechaya raban Undi18 tau meri empas ngagai pemutus PRU15, tang ukai semina naka nyadi ‘kingmaker’.

Ku iya, pengawa ngemendarka pengundi beumur entara 18 enggau 20 taun ambika tau ngundi maya pengawa bepilih, udah nambahka 30 peratus dalam puku rata penyampau pengundi ti tau ngundi.

“Taja pia nya ukai ngasuh sida nyadi ‘raja’ laban sechara puku rata peratus pengundi beumur 21 enggau 45 taun agi tinggi ba penyampau pengundi ti tau ngundu ke sekali tu.” ku iya.