KUCHING: Program Pemereti Ati Pemansang Integriti Begulai enggau Komuniti (CIB) ulih mantu raban ti bekuasa kandang menua (PBT) meri servis ti manah, ti nadai bekaul enggau penyalah makai suap sereta bisi integriti.

Sapit Menteri di Opis Premier Sarawak (Integriti enggau Ombudsman) Datuk Dr Juanda Jaya madah, tu mega ulih nentuka pengawa ngatur perintah ti manah ulih dijapai.

Kebuah pia, ku iya, CIB ti dikemansangka Institut Integriti Malaysia (IIM) enggau Unit Integriti enggau Ombudsman Sarawak (UNIONS) iya nya siti ari mekanisme dalam nentuka servis PBT dipejalaika nitih pematut.

“Pia mega kitai bisi raban ketiga iya nya ari komuniti ti deka sama matau dalam nentuka pejalai program PBT tu dipejalaika enggau manah.

“Kelimpah ari nya, raban kunteriktor ti dichiri deka sama dipeda komuniti laban sida nemu agi nama ti deka dijapai,” ku iya ba pengerami ngemunka Program CIB Renggar Dewan Bandaraya Kuching Utara (DBKU) di Dewan Bandar Baru Samariang ditu, bedau lama ti udah.

Ku Juanda madah, empat PBT iya nya DBKU, Opis Kaunsil Mengeri Sibu (SMC), Opis Kaunsil Pelilih Menua

Limbang (MDL) enggau Opis Kaunsil Pelilih Menua MatuDaro (MDMD) udah dipilih dalam bejalaika program CIB ti berengkah kenyau ari bulan Julai nyin kemari.

Kenyau ari nya, ku iya, IIM endang bebendar ngelatih PBT sereta komuniti dalam nentuka pengawa CIB dipejalaika enggau lanchar.

“Empat kandang menua ti ngembuan gaya PBT ti enda sama lalu nyema program tu dipejalaika enggau manah jemah ila, kitai deka ngerembaika ngagai selampur PBT ti bisi di selampur nengeri Sarawak,” ku iya nerang.

Bejalaika program CIB di DBKU udah berengkah kenyau ari 18 Ogos 2022 lalu nyentuk diatu mujur mutarka tujuh kes ti diripot asil ari kaul aktif Komiti Khas CIB matau sereta komuniti di kandang menua nya dalam meri ripot ngagai CIB nengah Kumpulan Kerja Bersama (JWG) CIB ti dichiri IIM enggau DBKU.

Inisiatif tu mega ulih mantu nentuka tikas pemanah gawa ti ulih diguna inisiatif Pelin Nagang Penyalah Makai Suap Nasional (NACP) dalam ngadaka rayat enggau komuniti ti ngembuan ulah ke bisi integriti tinggi.

Sama datai iya nya Ketuai Pemesai Eksekutif IIM Datuk Wan Suraya Wan Mohd Radzi enggau Datuk Bandar DBKU Datu Junaidi Reduan.

Pia mega kitai bisi raban ketiga iya nya ari komuniti ti deka sama matau dalam nentuka pejalai program PBT tu dipejalaika enggau manah.

Datuk Dr Juanda Jaya Sapit Menteri di Opis Premier Sarawak (Integriti enggau Ombudsman)