KUCHING: Bisi 150 iku datai ngulu enggau ngemujurka Karnival Jaku Iban SK RH Tayai, ke diatur kolaborasyen begulai entara sekula nya enggau Sarawak Dayak Educators Association (SDEA) Pampang Bintulu, apin lama.

Chairman Pengatur Program Karnival nya, Sapit Kepala Pengajar SK RH Tayai,Mr. Bigam Masam madah tuju karnival nya diatur dikena ngetanka jaku enggau adat asal bansa Iban.

“Nengah program ti baka tu, kami ke nyadi pengatur nya ngarapka jaku enggau adat asal bansa Iban ulih di- tanka lalu dikerindu mensia

mayuh kelebih agi bala nembiak rebak baru,” ku iya.

Nambah nya, Chairman SDEA Pampang Bintulu, Paul Jarum madahka, gerempung nya seruran besedia deka nempa kolaborasyen enggau sekula nya jemah ila.

“Kitai ngarapka jemah ila ulih neruska kolaborasyen begulai enggau SK RH Tayai,” ku iya.

Program Karnival Jaku Iban tu diatur pengelama tiga hari (25 - 27 Oktober 2022) ti disediaka mayuh bengkah program ba pengawa pemansang ngepan asal, mandangka kereban bumai, mandangka kereban betabuh, mandang kereban berikan sereta mandangka kereban ngasu.

Nambah nya pekit karaoke lagu Iban, pekit Explorasi Jaku Iban, pekit betabuh sereta pekit mandangka ngepan asal mega bisi diatur.

Karnival tu digulu bala Komiti Opis Pelajar Pelilih Tatau/Sebauh, Komiti SDEA Pampang Bintulu, Nembiak enggau staf SK RH Tayai enggau bala raban Gerempung Apai Indai enggau Pengajar (PIBG) SK RH Tayai.

Sama ngemujurka karnival tu mega, Sapit Ketuai Opis Pelajar Pelilih Tatau/Sebauh, Mr. Koleh Anyan; Kepala Pengajar SK RH Tayai, Mr. Assun Gani; Ketuai Panitia Jaku Iban, Pengajar Alessandra Tangai sereta sida ke bukai.